The Definitive Guide to Living in the Capital , Cairo , Egypt

الإنترنت بقى جزء أساسي من يومنا، بنصحى عليه، ونشتغل من خلاله، ونقضي عليه وقت فراغنا كمان. لكن السؤال المهم هنا، إحنا كمصريين بنستخدمه إزاي فعلًا؟ أحدث بيانات صادرة عن الجهاز القومي لتنظيم الاتصالات بتدينا صورة واضحة جدًا عن سلوك المستخدمين في مصر خلال 2026، مش بس أرقام ضخمة، لكن كمان مؤشرات مهمة بتكشف إحنا بنحب إيه، وبنقضي وقتنا فين، وإزاي شكل الحياة الرقمية بيتغير حوالينا بسرعة.

خلينا نبدأ بالأرقام اللي بتقول كتير: حوالي 65.6 مليون مصري بيستخدموا الإنترنت يوميًا، منهم 55 مليون بيستخدموا محركات البحث، و54.3 مليون نشطين على السوشيال ميديا. لكن الفكرة مش في الأرقام بس، لكنها في المصريين بيستخدموا الإنترنت في إيه بالظبط!

الترفيه هو الملك

اللي واضح جدًا إن الترفيه في الصدارة وبفارق كبير. استهلاك المحتوى الترفيهي في مصر زاد بنسبة 60% مقارنة بـ 2025، وده رقم ضخم. أما منصات البث زي نتفليكس وشاهد، فحققت نمو أكبر وصل لـ 67%، وده الأعلى بين كل الأنشطة. وأكتر من 52 مليون مستخدم بيقضوا مع بعض حوالي 43.7 مليون ساعة يوميًا في مشاهدة المحتوى الرقمي.. ويمكن ده بيفسر ليه ناس كتير بقت تفضل المنصات دي على التليفزيون التقليدي، خاصة في مواسم زي رمضان.

الفيديوهات القصيرة: الإدمان السريع

بعد منصات البث، بتيجي الفيديوهات القصيرة أو “الريلز” والـ short videos، واللي زاد استهلاكها برضه بنسبة 60%. حوالي 42.6 مليون مستخدم مش بس بيتفرجوا عليها، لكن كمان بيشاركوا في صناعتها.. وده بيأكد فكرة مهمة، وهي إنه مش إن تركيز الناس قل، لكن بقى متقسم. شوية وقت للفيديوهات الطويلة، وشوية لجرعات سريعة وخفيفة.

ما يفوتكش كمان: “إد بيبول – Ed People” في القاهرة: حكاية الشاب البلجيكي اللي بيرقص مع المصريين!

الجيمينج بقى أسلوب حياة

الألعاب الإلكترونية خرجت من كونها مجرد تسلية. النهارده فيه حوالي 31 مليون لاعب يوميًا في مصر، بزيادة 21% عن قبل. والأهم إن الجيمرز بيمثلوا حوالي 91.6% من مستخدمي الإنترنت، وده رقم ضخم جدًا، بيأكد إن السوق ده في طريقه يبقى من الأكبر في المنطقة.. وده مرتبط كمان بنمو محتوى الألعاب، والبث المباشر، وحتى فرص الربح من المجال ده.

مش كله ترفيه

رغم سيطرة الترفيه، لكن فيه استخدامات تانية بتكبر بهدوء. الاجتماعات أونلاين زادت بنسبة 7%، مع 6.5 مليون مستخدم قضوا حوالي 159.5 مليون ساعة. وده مرتبط جزئيًا بسياسات زي العمل من المنزل، لكن كمان بيعكس اتجاه أكبر نحو الشغل المرن والهجين.

الأونلاين شوبينج كمان مستمر في النمو، مع 29.8 مليون مستخدم وزيادة 10%. مش نمو سريع جدًا، لكنه ثابت، ومدفوع بالراحة وسهولة الوصول، وكمان بتغير شكل سوق التجزئة نفسه.

الموبايل في الصدارة

الاستخدام عبر الموبايل زاد بنسبة 12%، مع دخول حوالي 8 مليون مستخدم جديد. وفي نفس الوقت، الإنترنت الأرضي زاد بنسبة 36% مع مليون مشترك إضافي.. وده معناه إن الوصول بقى أسهل، وبالتالي استخدامات الإنترنت بقت أكتر تنوعًا.