The Definitive Guide to Living in the Capital , Cairo , Egypt

فيه جرائم بتتحل، وجرائم تانية بتفضل محل جدل لسنين بسبب سؤال واحد محدش قدر يجاوبه: مين الجاني؟ ومذبحة بني مزار واحدة من النوع التاني. جريمة حصلت من أكتر من 20 سنة، مات فيها 10 أشخاص من 3 أسر مختلفة، واتقفلت القضية من غير ما نعرف بشكل قاطع مين القاتل. يمكن علشان كده كانت اختيار مثالي لمسلسل القصة الكاملة، اللي بيحاول يرجع لقضايا حقيقية شهيرة ويعيد تقديمها في شكل درامي.

حكاية ما لم يُحكَ عن بني مزار هي الحكاية التانية من المسلسل، وبتتكون من 3 حلقات، وبتاخدنا لعزبة صغيرة في بني مزار بالمنيا، بعد اكتشاف 10 جثث داخل 3 بيوت. اتقتلوا في نفس الليلة قبل الفجر بوقت قليل، وفي وقت متقارب، وفي بيوت قريبة من بعضها. من هنا يبدأ النقيب أكرم (أحمد عبد الوهاب) التحقيق في قضية تعتبر واحدة من أغرب وأعقد جرائم القتل في مصر.

القصة الحقيقية بتقول إن القضية انتهت باتهام شخص واحد، لكن محكمة جنايات المنيا حكمت ببراءته سنة 2006، وبعدها أيدت محكمة النقض البراءة بشكل نهائي سنة 2008، وسط تناقضات في الأدلة والتقارير وشكوك حوالين إمكانية تنفيذ شخص واحد للجريمة بالصورة اللي اتقدمت في التحقيقات. النتيجة إن القضية اتقفلت قضائيًا، لكن السؤال الأهم اللي فضل موجود بعد إغلاق القضية: لو المتهم الوحيد مش هو اللي عمل كده، مين الجاني في مذبحة بني مزار؟!

هاني سرحان، كاتب سيناريو وحوار المسلسل – اعتمادًا على حلقات سامح سند –، كان شايف من وجهة نظره إن المادة الحقيقية لوحدها مش كفاية علشان تعمل مسلسل. لأنك في النهاية بتتعامل مع قضية مفيش عندك حل نهائي ليها، وبالتالي بدل ما الحكاية تتحول لتحقيق طويل بنستنى في آخره نعرف القاتل، المسلسل بيستخدم الجريمة كباب ندخل منه لعالم مليان خوف وخرافات وشائعات وحكايات عن السحر والآثار والذهب المدفون. عملية الخروج من الواقع للخيال دي كان فيها مخاطرة كبيرة، لإن البعض شاف إن مجرد سرد القصة الحقيقية بكل ما فيها من تناقض وغموض كان كفيل إنه يعمل مسلسل قوي، والبعض كان شايف إن الخيال لازم يكون طرف في المعادلة.

وده واضح جدًا في شخصية أكرم اللي بيقدمها أحمد عبد الوهاب. هو هنا مش ضابط خارق داخل يحل القضية في يومين، لكنه شخص بيغرق بالتدريج في كم هائل من الروايات المتناقضة. مرة الخيط يقربه من تفسير منطقي، ومرة يلاقي نفسه وسط كلام عن السحر، ومرة الحكاية تروح ناحية البحث عن الآثار والذهب، وفي كل مرة يبدو إننا قربنا من الإجابة، يظهر سؤال جديد يرجعنا تقريبًا لنقطة البداية.

أحمد عبد الوهاب نفسه عامل اختيار غريب ومثير للاهتمام في الشخصية. أداؤه هادي بشكل واضح، وأحيانًا الهدوء ده ممكن يتفهم عند بعض المشاهدين باعتباره بطء أو فتور، وده فعلًا كان واحد من جوانب الجدل حوالين أدائه في المسلسل، وحسينا إنه لسه ماخرجش من عباءة دوره في مسلسل (ورد على فل وياسمين)، وكان محتاج يدرس أكتر إزاي يعمل شخصية الضابط بحيث يبقى مقنع وفي نفس الوقت مش نمطي.

ميشيل ميلاد بيقدم أداء نقدر نعتبره من أفضل الأدوار في المسلسل كله، والحقيقة إن ميشيل نجم قادم بسرعة وبيثبت لنا في كل دور بيقوم بيه إنه قادر يتنقل بخفة واحترافية بين نوعيات مختلفة من الأدوار، سواء الكوميدي أو التراجيدي وغيرها، ودي نقطة قوة تحسب له.

وجود مراد مكرم وأحمد عبد الحميد وصفاء الطوخي وعارفة عبد الرسول، مع ظهور خالد الصاوي كضيف شرف، بيدي العالم المحيط بالقضية وزن أكبر. خصوصًا إن المسلسل محتاج وجوه تحس إنها جزء من المكان والحكايات اللي بتتقال، مش مجرد شخصيات موجودة كنوع من أنواع سد الخانة.

ومن الشخصيات اللي بتلفت النظر شخصية ست البركة اللي بتقدمها صفاء الطوخي. وجود الشخصية بيساعد المسلسل يدخل مساحة الخرافة والموروث الشعبي من غير ما يتحول فجأة لمسلسل رعب صريح. وهنا واحدة من أحسن أفكار الحكاية: إحنا طول الوقت مش عارفين هل اللي بيتقال قدامنا خيط حقيقي في القضية، ولا مجرد تفسير صنعه الخوف في مجتمع بيحاول يلاقي أي إجابة لجريمة شكلها أكبر من قدرته على الفهم.

أحمد نادر جلال، مخرج الحكاية، استغل النقطة دي كويس جدًا. الصورة فيها إحساس خانق، والبيوت والشوارع والليل والمقابر مش مجرد خلفية للأحداث، لكن جزء أساسي من حالة المسلسل. مافيش اعتماد كامل على الدم أو مشاهد القتل علشان يخوفك، لأن الرعب الحقيقي هنا جاي من فكرة أبسط بكتير: إن جريمة بالحجم ده ممكن تحصل، وفي الآخر محدش يعرف بشكل مؤكد مين عملها.

لكن أكتر حاجة ممكن تظلم (ما لم يُحكَ عن بني مزار) هي إننا اتفرجنا عليه وإحنا عندنا توقعات عالية جدًا بسبب الجزء الأول اللي كان مستواه عظيم، بالإضافة لطبيعة القضية نفسها اللي بنتابع كل الأخبار عنها من وقت حدوثها لحد اليوم، بالتالي اتفرجنا بشعور مسبق إننا المفروض نتفرج على عمل استثنائي وخارق للعادة. ولما الجمهور يوصل له الشعور ده، أي عمل مهما كان كويس مش هايرضي طموحهم اللي وصل السما خلاص.

(ما لم يُحكَ عن بني مزار) مش أفضل مسلسل جريمة في العالم، لكنه مش أسوأ مسلسل برضو، صناعُه اجتهدوا علشان يقدموا أفضل ما عندهم وسط توقعات عالية جدًا من المشاهدين، وغالبًا اللي هايتفرج على المسلسل إما هايشوفه قوي جدًا، أو ضعيف جدًا، علشان النوعية دي من الأعمال مافيهاش مكان للحلول الوسط.