The Definitive Guide to Living in the Capital , Cairo , Egypt

لو فاكر إنك جربت كل أنواع القهوة في القاهرة، يبقى محتاج تدي فرصة لمكان زي بن نافع. المكان ده مش مجرد محمصة بن، لكنه تجربة متكاملة لعشاق القهوة اللي بيدوروا على الجودة الحقيقية والنكهات اللي جاية من قلب اليمن والبرازيل والهند والخليج.

بين شوارع الزمالك الهادئة، وتحديداً في 23 شارع إسماعيل محمد بمنطقة أبو الفدا، وقعنا بالصدفة على “اكتشاف” جديد هيغير مفهومك عن القهوة في مصر، “بن نافع” مش مجرد محمصة بن عادية، لكن هو ملتقى لثقافات القهوة اليمنية، البرازيلية، الهندية، والسعودية، في مكان صغير في المساحة لكنه عملاق في الجودة الـ”بريميوم” اللي متعرفش الحلول الوسط، واللي بيميزه أنهم بيستخدموا حبيبات بن بجودة Premium نادرة الوجود في السوق المصري، وده لأن صاحب المكان بخبرته اللي أكتسبها من اليمن وتركيا والخليج، قرر أن ينقل تجربة “الكيف المظبوط” بكل تفاصيله.

سعر كيلو البن المحوج: 3800 جنيه.

سعر فنجان القهوة التركي: 275 جنيه للكوب الدبل، ورأينا فيه أنه رغم السعر ممكن يكون عالي إلا أن التجربة الحسية والمذاق بيبرروا كل جنيه، انتوا هتشربوا “خلاصة” خبرة وسلالات بن يمني وبرازيلي وهندي منتقاة بعناية.

سحر “التحويجة” وتفاصيل التحضير.

جربنا من “نافع” البن الفاتح، والسر هنا في “التحويجة” الطازجة؛ لأنه بيتم طحن جوزة الطيب وحبوب الحبهان مع البن مباشرة قدامكم، وده بيدي الفنجان رائحة نفاذة وطعم غني لا يضاهى.

القهوة التركي بتقدم بوش مثالي، ورغم أنها تُحضر بماكينة قهوة متطورة مش رمالة أو سبرتاية لكن محسيناش بفرق عن سمات القهوة الأصيلة اللي بيدور عليها المحترفون وعشاق القهوة.

المكان والخدمة: ابتسامة وشغف بالعملاء.

المكان حالياً يتسم بالبساطة والهدوء ومفيش قعدة كبيرة، فقط (ترابيزتين) بالأسفل، مع وجود طابق علوي بيتجدد دلوقتي لأن المكان بيطور نفسه وهيقدم وجبات إفطار يومية.

فريق العمل الحالي فردين فقط، لكن نقدر نقول أنهم قمة الرقي ومرحبين جدًا ومعروفين للعملاء اللي بيدخلوا يرحبوا بيهم والغريب أنهم بينادوهم بالاسم رغم أن العملاء اللي دخلوا مكنوش مصريين وكمان كانوا مسافرين لهم فترة، وطوال فترة وجودنا هناك الابتسامة مفارقتش وشهم، وعندهم شغف أنهم يشرحوا كل تفصيلة للعميل، وده هيخلي تجربة الشراء أو شرب القهوة رحلة تعليمية ممتعة.

العنوان: 23 شارع إسماعيل محمد، أبو الفدا، الزمالك.

تقدروا تعرفوا أكتر عنهم زوروا صفحتهم على فيسبوك من هنا.

نصيحة كايرو 360: لو أنتوا من عشاق القهوة وبتقدروا الجودة بعيدًا عن السعر فـ”بن نافع” هو زيارتكم اللي جاية بدون نقاش.