The Definitive Guide to Living in the Capital , Cairo , Egypt

القاهرة مش محتاجة عربية علشان تفتح لك أبوابها، ساعات كل اللي بينك وبين يوم مليان تاريخ وفن وأكل ومشي على النيل هو تذكرة مترو ولبس مريح.

من محطة مار جرجس اللي بتنزلك قدام مجمع الأديان، لحد صفاء حجازي والأوبرا وباب الشعرية، جمعنا لك 5 خروجات كاملة تقدر تعملها بالمواصلات العامة، ومع كل محطة هتلاقي ترتيب الأماكن، مواعيد الزيارة، أسعار التذاكر والوقت المناسب للخروجة.

الأسعار والمواعيد الواردة في الدليل تمت مراجعتها في سبتمبر 2026، لكنها قابلة للتغيير، خصوصًا مواعيد دور العبادة والحفلات والأماكن المفتوحة.

محطة مار جرجس: رحلة بين الأديان في قلب مصر القديمة

المحطة: مار جرجس – الخط الأول

أفضل وقت للزيارة: من 9 صباحًا

مدة الخروجة: من 3 إلى 4 ساعات

ميزانية المزارات: 20 جنيهًا للمصري البالغ

بمجرد خروجك من محطة مار جرجس هتلاقي نفسك وسط واحد من أغنى التجمعات التاريخية والدينية في القاهرة، والمسافات بين أغلب المزارات قصيرة، فدي من أسهل الخروجات المناسبة للعائلات ومحبي التصوير والتاريخ.

المتحف القبطي

ابدأ بالمتحف القبطي قبل الزحام، وهو تأسس على يد مرقس سميكة باشا وافتُتح سنة 1910، وبيضم واحدة من أهم مجموعات الفن القبطي في العالم، من المنسوجات والأيقونات إلى المخطوطات والأعمال الخشبية، ويعمل يوميًا من 9 صباحًا حتى 5 مساءً، وسعر التذكرة للمصريين 20 جنيه وللطلاب 10 جنيهات، والأجانب 280 جنيه وللطلاب الأجانب 140 جنيه.

الكنيسة المعلقة

الكنيسة المعلقة واحدة من أشهر كنائس مصر، واتسمت بالاسم ده لأنها مبنية فوق برجين من أبراج حصن بابليون الروماني، جوها الداخلي وتفاصيلها الخشبية وأيقوناتها يستحقوا تدوها وقت من غير استعجال، والدخول مجاني,

كنيسة أبي سرجة

واحدة من أقدم كنائس مصر، وأهم ما يميزها السرداب المرتبط برحلة العائلة المقدسة في مصر، الكنيسة مبنية داخل نطاق حصن بابليون، ويرجع تاريخها إلى القرون الأولى للمسيحية، والدخول مجاني ولكنها تغلق الزيارات الساعة 4 مساءً.

معبد بن عزرا

المعبد من أشهر المعابد اليهودية التاريخية في القاهرة، وارتبط اسمه بوثائق “الجنيزا” التي كشفت تفاصيل نادرة عن الحياة الاجتماعية والاقتصادية ليهود المنطقة خلال قرون طويلة، والدخول لها مجاني ويتم الإغلاق الساعة 4 مساءً.

مسجد عمرو بن العاص

لو عايز تكمل رحلة الأديان الثلاثة، امشِ إلى مسجد عمرو بن العاص، أهم مسجد أُنشئ في مصر وأفريقيا بعد الفتح الإسلامي، والدخول له مجاني وأوقات الزيارة السياحية من 9 صباحًا حتى 4 مساءً، ومن المهم تجنب أوقات الصلاة والالتزام بالملابس المناسبة للمسجد.

ترتيب الخروجة المقترح: المتحف القبطي ← الكنيسة المعلقة ← كنيسة أبي سرجة ← معبد بن عزرا ← مسجد عمرو بن العاص.

محطة السادات: من الفراعنة إلى قهوة وسط البلد والنيل

المحطة: السادات – الخطان الأول والثاني

أفضل وقت: من 9 صباحًا

مدة الخروجة: من 6 إلى 8 ساعات

ميزانية المزارات: 50 جنيهًا في الأيام العادية، وتصل إلى 60 جنيهًا في نهاية الأسبوع

دي الخروجة المناسبة للي عايز يشوف أكتر من وجه للقاهرة في يوم واحد، آثار فرعونية، عمارة وسط البلد، قهوة تاريخية، حلويات كلاسيكية، وفي النهاية مشي على النيل.

المتحف المصري بالتحرير

ابدأ يومك بالمتحف المصري علشان تلحق القاعات قبل زحام منتصف اليوم. المتحف من أقدم المتاحف الأثرية في المنطقة، وبيضم مجموعات ضخمة من الآثار المصرية القديمة، من بينها لوحة نارمر وكنوز تانيس ومقتنيات يويا وتويا، ويعمل من 9 صباحًا حتى 5 مساءً، وأسعار التذاكر للمصريين 30 جنيه، والطلبة 10 جنيهات، وللأجانب 550 جنيه، والطلاب الأجانب 275 جنيه.

شوارع وسط البلد

بعد المتحف، ابدأ جولة مشي من ميدان التحرير إلى شارع قصر النيل وميدان طلعت حرب، وبعدها شارع عبد الخالق ثروت ومنطقة عدلي.

الجولة مجانية ومفتوحة طوال اليوم، لكن متعتها الحقيقية في التركيز على تفاصيل واجهات العمارات القديمة والممرات والمكتبات والمحلات التاريخية.

كافيه ريش

كافيه ريش جزء من ذاكرة وسط البلد، وارتبط على مدار تاريخه بالكتّاب والفنانين والسياسيين، وتقدر تقعد فيه لقهوة أو غداء خفيف وسط أجواء القاهرة الكلاسيكية، وعنوانه 17 ميدان طلعت حرب.

جروبي جاردن

المقصود هنا فرع جروبي جاردن في شارع عبد الخالق ثروت، بالقرب من منطقة عدلي، المكان مناسب لاستراحة قصيرة أو حلو وقهوة قبل استكمال اليوم، وهو موجود في 46 شارع عبد الخالق ثروت.

ممشى أهل مصر

وتقدروا تتمشوا أو تركبوا تاكسي أو حتى تاخدوا المترو لمحطة ماسبيرو الخط الثالث للوصول إلى ممشى أهل مصر، وفيه هتلقوا المستوى السفلي على النيل مباشرة، وهو الجزء التجاري اللي بيضم المطاعم والكافيهات ومناطق الجلوس وسعر التذكرة 20 جنيه الأيام العادية و30 جنيه للويك إند والعطلات، بينما المستوى العلوي ممشى مفتوح بمحاذاة الكورنيش وهو مجاني.

ترتيب الخروجة المقترح: المتحف المصري ← قصر النيل وطلعت حرب ← كافيه ريش ← جروبي جاردن ← مترو ماسبيرو ← ممشى أهل مصر.

محطة صفاء حجازي: يوم ثقافي كامل في الزمالك

المحطة: صفاء حجازي – الخط الثالث

أفضل وقت: من 9 صباحًا

مدة الخروجة: يوم كامل

ميزانية المزارات: 20 جنيهًا

محطة صفاء حجازي مناسبة جدًا لخروجة تبدأ بكتاب، تمر بمعرض فني، وتنتهي بحفلة أو عرض مسرحي.

مكتبة القاهرة الكبرى

المكتبة موجودة داخل قصر الأميرة سميحة كامل في الزمالك، وده بيخلي الزيارة مميزة حتى قبل ما تبدأ تتفرج على الكتب والمقتنيات، المكتبة بتضم مجموعات متنوعة عن القاهرة وتاريخها، بجانب قاعات للقراءة والفعاليات، وهي موجودة في 15 شارع محمد مظهر وسعر التذكرة 20 جنيه ومواعيد الزيارة من الساعة 9 صباحًا حتى 2 ظهرًا,

قصر عائشة فهمي – مجمع الفنون

قصر عائشة فهمي مش متحفًا تقليدي عادي ولكنه مساحة فنية تاريخية بيقام فيه معارض مميزة ويعتبر من أهم وأجمل قصور الزمالك، والدخول مجاني ويعمل طوال أيام الأسبوع ماعدا الجمعة والأحد من 9 حتى 6 صباحًا، وهو موجود في 1 شارع عزيز أباظة أسفل كوبري 15 مايو.

ملحوظة: في حالة عدم وجود معارض يغلق المتحف أمام الجمهور ويجب التأكد قبل الزيارة من مواعيد العمل.

ساقية عبد المنعم الصاوي

بنرشح دايمًا أن ساقية الصاوي تكون آخر محطة في اليوم، ولو حابين تحضروا حفلات لازم تحجزوا قبلها، والساقية بتستضيف حفلات موسيقية ومسرح وندوات وعروض عرائس وستاند أب كوميدي، وكل حفلة لها سعر تذكرة وتبدأ من 50 جنيه وبتوصل لـ400 جنيه، وكمان هناك فيه كافيه مميزعلى النيل والدخول مجانًا بعيدًا عن الحفلات.

محطة الأوبرا: حدائق وممشى وإطلالة على النيل

المحطة: الأوبرا – الخط الثاني

أفضل وقت: بعد العصر، أو من الصباح لو عايز تستفيد من فترة الرياضة المجانية

مدة الخروجة: من 5 إلى 7 ساعات

ميزانية المزارات: 65 جنيهًا في الأيام العادية، وتصل إلى 80 جنيهًا في نهاية الأسبوع

الخروجة دي معمولة للجو الحلو: مساحات خضراء، تصوير، مشي على النيل وعشاء في مكان مفتوح، أغلب المحطات قريبة من بعضها، لكن اليوم فيه قدر متوسط من المشي.

حديقة الحرية

حديقة صغيرة وهادية قريبة من محطة الأوبرا، وبتتميز بتماثيل عدد من الشخصيات المؤثرة من مصر ودول مختلفة، ومواعيد العمل من 9 صباحًا حتى منتصف الليل، وسعر التذكرة 20 جنيه للفرد.

حديقة الأندلس

واحدة من أشهر حدائق القاهرة التراثية، وبتجمع بين التصميم الأندلسي والإطلالة المباشرة على النيل، مناسبة للتصوير والجلوس وقت الغروب، وسعر تذكرة الدخول 20 جنيهًا، وتعمل من 9 صباحًا حتى 10 مساءً.

برج القاهرة: صورة من الخارج حاليًا

رغم أنه مغلق حاليًا للتطوير إلى أنه من أهم الزيارات اللي لازم تكون موجودة في خطتكم، ولم يتم تحديد موعد إعادة افتتاحه أو أسعار التذاكر بعد التطوير، ولكن متاح التصوير خارج البرج خاصة أمام أقدم وأكبر شجرة في القاهرة.

محطة باب الشعرية: تاريخ شارع المعز.. القاهرة القديمة على رجلك

المحطة: باب الشعرية – الخط الثالث

نوع الخروجة: تاريخ وعمارة إسلامية وشوارع القاهرة القديمة

المدة المقترحة: من 5 إلى 6 ساعات

ميزانية المزارات: 30 جنيهًا تقريبًا

من محطة باب الشعرية تقدر تبدأ واحدة من أغنى جولات القاهرة التاريخية، خروجة بتجمع بين المباني التاريخية والمدارس والمساجد وعراقة شارع المعز بتراثه الفاطمي والمملوكي.

باب الفتوح

بعد الخروج من المحطة توجه ناحية باب الفتوح، واحد من أشهر أبواب سور القاهرة الفاطمية، واللي اتبنى بصورته الحالية في القرن الـ21 الميلادي، ويعد من أفضل نقاط بداية جولة شارع المعز، لأنك هتدخل من الاتجاه الشمالي للشارع وتتحرك تدريجيًا وسط المباني التاريخية ويعتبر منطقة عامة والدخول مجانًا.

شارع المعز لدين الله الفاطمي

المشي في شارع المعز رحلة مستقلة وسط القاهرة القديمة، بداية من المساجد والمدارس والأسبلة، وصولًا إلى البيوت والقصور التاريخية.

دخول الشارع نفسه مجاني، لكن زيارة مجموعة من مبانيه الأثرية تحتاج إلى تذكرة موحدة، ومواعيد الزيارة من 9 صباحًا حتى 5 مساءً، وأسعار التذاكر للمصريين 20 جنيهًا والطلبة 10 جنيهات، أما الأجانب فسعر التذكرة 220 جنيه، وللطلبة 110 جنيه، وتشمل “مجموعة السلطان المنصور قلاوون – مدرسة ومسجد الناصر محمد – مسجد ومدرسة السلطان برقوق – قصر الأمير بشتاك – مسجد وسبيل سليمان أغا السلحدار – مدرسة الكامل – وحمام السلطان إينال”.

بيت السحيمي

قبل ما تنهي جولتك، ادخل الدرب الأصفر لزيارة بيت السحيمي، واحد من أجمل البيوت العربية العثمانية الباقية في القاهرة، والبيت مميز بأفنيته الداخلية والمشربيات الخشبية وقاعات الاستقبال، وبيقدم صورة واضحة عن شكل الحياة داخل بيوت القاهرة الثرية قديمًا، ومواعيد العمل من 9 صباحًا حتى 4 مساءً، وسعر التذكرة 10 جنيهات للمصريين و5 للطلاب، وللأجانب 220 جنيه و110 للطلبة الأجانب.

ترتيب الخروجة المقترح

محطة باب الشعرية ← باب الفتوح ← شارع المعز ومبانيه التاريخية ← بيت السحيمي ← مجموعة السلطان قلاوون.

أخيرًا بعد الدليل الشامل لزيارات القاهرة بالمترو وبدون العربية هل جربتم تخوضوا التجربة من قبل ولا هتخططوا ليها.