The Definitive Guide to Living in the Capital , Cairo , Egypt

لما يجتمع سحر التاريخ مع جمال الموسيقى، أكيد النتيجة هتكون مكان استثنائي زي بيت العود العربي داخل بيت الهراوي. من قلب القاهرة التاريخية، وتحديدًا في أزقة الأزهر العريقة، بيقدم المكان تجربة فريدة تجمع بين التراث المعماري الأصيل وفن العود الراقي. ومنذ تأسيسه على يد الفنان الكبير نصير شمه عام 1998، أصبح بيت العود واحد من أهم الصروح الفنية المتخصصة في تعليم العود وإحياء حفلاته، بينما يظل بيت الهراوي نفسه شاهد على قرون من التاريخ والثقافة والإبداع.

خلال السطور الجاية هنقول لكم كل اللي محتاجين تعرفوه عن تاريخ بيت الهراوي اللي بيحتضن “بيت العود”.

بيت الهراوي هو واحد من أشهر البيوت التاريخية القديمة في القاهرة، وتم بناءه سنة 1731 ميلادية، واللي بناه هو أحمد بن يوسف الصيرفي، وآخر شخص امتلكه هو الدكتور عبد الرحمن باشا الهراوي سنة 1881، وهو حاليًا مزار أثري وبيتعمل فيه حفلات ثقافية وفنية.

البيت له واجهتين، وموجود بجانب بيت الست وسيلة اللي مقابل لبيت السحيمي خلف مسجد الأزهر، وهو مكون من دورين. الدور الأول هتلاقوا فيه فيه ممر وملحقات المنزل زي الطاحونة والإسطبل وحاصل الغلال، والحوش بتاع البيت، وقاعة “المقعد الصيفي”، والسلالمك وغرفة السرداب.

أما الدور الثاني من بيت الهراوي فهتلاقوا فيه المندرة، والقاعة الرئيسية وممر تاريخي مميز، وكمان بناء بارز داخلي علشان يوصل لغرفة الانتظار اللي فيها سقف خشبي بيفتح للشارع وكأنه شباك.

بيت الهراوي اترمم مرتين، الأولى سنة 1986، والثانية سنة 1993، واتحول لمركز إبداع فني بداية من سنة 1996.

بالإضافة إلى أن البيت تحفة فنية تاريخية تستحق الزيارة، هتقدروا كمان تحضروا فيه أجمل حفلات العود، واللي بيقدمها فنانين مهمين في المجال ده.

وعلشان تعرفوا مواعيد الحفلات دي، تابعوا الصفحة دي.