The Definitive Guide to Living in the Capital , Cairo , Egypt

لما بتقرأ كلمة “قاتل متسلسل”، إيه الصورة الذهنية اللي بتيجي في بالك؟ شخص نظراته حادة وجسمه ضخم، عصبي في كلامه وعنيف في ردود أفعاله. وكل حاجة فيه بتقول، بشكل أو بآخر، إنه مجرم أو يستحسن الابتعاد عنه. فيلم Trap بينسف تمامًا الفكرة الذهنية دي.

فيلم Trap بيحكي عن كوبر، اللي بيجسد شخصيته جوش هارتنت، الأب المحب لبنته، واللي بيصطحبها معاه علشان يحضروا حفلة لمطربتها المفضلة، واللي قامت بالدور ساليكا شيامالان. وفي منتصف الحفلة بنبدأ نحس إن الإجراءات الأمنية أكتر تعقيدًا من اللي المفروض تكون عليه، وبنكتشف مع استمرار الأحداث إن الحفلة كلها مجرد فخ لاستدراج قاتل محترف معروف باسم “الجزار”، وبنكتشف كمان إن القاتل ده ما هو إلا كوبر، الأب الطيب اللي واخد بنته علشان تحضر الحفلة.

من أحلى مميزات فيلم Trap إنه مش بياخد وقت طويل علشان نوصل معاه للحقيقة دي. الفيلم من أول لقطة لآخر لقطة سلسلة لا تنتهي من الإثارة وحبس الأنفاس، وده اللي اتعودنا عليه من مخرج بحجم إم. نايت شيامالان، صاحب أعمال زي The Sixth Sense وThe Happening وغيرها.

ما يفوتكش كمان: بتحب الرعب والإثارة؟ 5 أماكن في القاهرة هتخليك تعيش مغامرة مش هتنساها

لكن من ناحية تانية، ما عجبناش في Trap الاستسهال والاعتماد على الصدف المبالغ فيها لتمرير مواقف مش منطقية. وعدم المنطقية كان العيب الأساسي من وجهة نظرنا في الفيلم، وخصوصًا في النصف التاني منه. بمعنى إننا بنشوف شخص واحد بس قادر يخدع مدينة كاملة تقريبًا، بكل من فيها من رجال أمن ومواطنين، بمنتهى السهولة ومن غير ما يقع في أخطاء حقيقية. بالتالي لازم اللي يتفرج على الفيلم يعمل حسابه إنه هيحتاج “يكبر دماغه” عن كتير من المواقف اللي بتحصل.

لكن الأمر اللافت للنظر، واللي يستحق الإشادة، هو اهتمام Trap بإظهار دور الطب النفسي في فهم دوافع الجريمة وتحديد الطريقة اللي بيفكر بيها كل مجرم علشان ينفذ جريمته. وكمان تنبيه المشاهد لفكرة إن الشخصية الإجرامية مش محتاجة تظهر بملامح غاضبة وأفعال عنيفة، وإن ممكن الشخص الهادي المبتسم اللي رايح مع بنته حفلة غنائية يكون هو الكابوس المسؤول عن سلسلة من الجرائم الغامضة.