The Definitive Guide to Living in the Capital , Cairo , Egypt

الصور: كريم البنا

فيه وقت ناس كتير بتقول فيه إن القاهرة بقت “مُظلمة” بعد قرارات ترشيد الكهرباء، شكل العاصمة في الليل بيقول حاجة تانية خالص.. القاهرة ماطفتش.. هي بس غيرت مزاجها.

الصور دي بعدسة المصور كريم البنا، العاشق لشوارع المدينة، اللي قرر يلف في قلب القاهرة من أول الليل لحد مطلع الفجر، ويوثق شكلها الجديد.. شكل أهدى، أقل صخب، لكنه لسة فيه روح ومليان حكايات.

من أواخر مارس 2026، بدأت الحكومة المصرية تطبيق إجراءات لترشيد استهلاك الكهرباء، من بينها تقليل الإضاءة وغلق المحلات والمطاعم مبكرًا عند الساعة 9 مساءً خلال أيام الأسبوع، و10 مساءً يومي الخميس والجمعة، في محاولة لتقليل الضغط على الطاقة.

القرارات دي خلت ناس كتير تتخيل إن القاهرة هتدخل في حالة “ظلام”.. لكن اللي حصل على الأرض كان مختلف تمامًا.

القاهرة ليلًا ما اختفتش… هي بس هديت.

من أول لحظة الغروب، لحد الساعات الأولى من الصباح، المدينة بتكشف عن وجه تاني؛ أنوار أقل، لكن إحساس أعلى. وزحمة أخف، لكن تفاصيل أوضح.

في نص الليل، الشوارع اللي كانت دايمًا مزدحمة بقت أوسع، وأهدى. الكباري بتنور بنور خفيف، والنيل بيبقى هو البطل الحقيقي للمشهد.

ومع اقتراب الفجر، القاهرة بتدخل مرحلة تالتة خالص.. هدوء شبه كامل، وصوت المدينة بيبقى واطي جدًا، كأنها بتاخد نفس عميق قبل يوم جديد.

المصور كريم البنا كان شايف الرحلة دي بعين مختلفة. بيقول: “أكتر وقت بحب فيه القاهرة هو قبل الفجر.. بتحس إنها على طبيعتها، من غير زحمة ولا ضوضاء.”

عدسته قدرت تلتقط لحظات بنزثق الفترة دي من تاريخ القاهرة، من أول أنوار المحلات اللي بتطفي بدري، لحد كشك صغير لسه منور في نص الليل، لحد شباك مفتوح مع أول خيط نور في السما.

المدينة اللي متعودة تصحى بالليل، ما نامتش.. هي بس بطّأت الإيقاع. يمكن مش نفس القاهرة اللي نعرفها، بس في الرحلة من الليل للفجر.. ممكن نشوفها بشكل أصدق.

وأخيرًا..

القاهرة مش محتاجة نور كتير عشان تبان.. هي محتاجة وقت، وهدوء.. وعين تفضل مستنية لحد الفجر.